පරක්කුව.

බස් එකේ තිරින්ගෙටත් කලින් පැනලා

කෝච්චිය නවත්වන්නත් කලින් බැහැලා

තත්පරෙන් පංගුවත් ඉතිරි කරලා
දුවන්නේ ජීවිතයත් පරදුවට තියලා
රට ගොඩනගන්න පරක්කු වෙලා නේද?

විනාඩියක ඉවසුමක්
නැති කහ එළිය දකින කල්
ගියරයට යන අත්
ඒ තත්පරෙන් පංගුවත්
රට ගොඩනගන්න පරක්කු වෙලා නේද?

ඔරලෝසුවේ කට්ටට කැරකෙන ඇස් ගෙඩි
දිවා බෝජනයෙන් තේ වෙලාව එනතුරු
ඇඟිල්ල ගහන මැෂිමට නිති දුවන හිත
ගෙදර ගිහින් රට ගොඩනගන්න නේද

මේ දුවන තරමට හැදුනානම් රට
චීන්නුත් ඉල්ලයි අද අපෙන් ණය!

හුස්මකට යදින රුපියල්!

පුංචි කිරිකැටි මුහුණු
කොච්චරක් දකිනවද
හැමදාම මුහුණු පොත
පිරෙන්නට හැම තැනම

හුරතල් කිරි සිනා
එක්ක මුල් පින්තූරෙ
ලෙඩ ඇදේ මැලවිලා
ඇති දෙවනි පින්තූරෙ

කොහොම මං දරන්නද
කටුත් බට ගත පුරා
දුක් විදින දරු පැටවු
මගෙ උන්ගේ වයසමයි

වරු ගණන් ගලනවා
කඳුළු කැට උන් නමින්
ඒ අම්මලා කොහොම
දරන් ඉන්නවා ඇත්ද

කෝටියක් හොයනවා
මෙච්චරක් තව මදිලු
පනට දින මෙච්චරලු
මං කොහෙන් දෙම් පුතේ?

කෝටියක් කෝටියක්
දවසකට කී දෙනෙක්
අම්මලා යදිනවද
හුස්මකට රුපියල්

කුරා කූබියෙක් වත්
දැන දැනම නොරිද්දා
යදින්නේ නොරිදන්න
ලොව සියලු දරු පැටවු!