නත්තල් නිවාඩුව.

නත්තල් නිවාඩුව

සිංගර් මහන මැශිමේ
අම්මා මහන නත්තල් ගවුම
ඇදගෙන මහ පාන්දරම
අවුරුදු නිවාඩුවට යන්ට ගම
ඇදුම් මල්ලත් හදාන කලින්දා
පාන්දට හතරට ඇහැරෙයිද මට?
ලොකු කට්ට පොඩි කට්ට
හතරට තව තියන පැය ගාන
ගණින අතරේ හිතේ දෙඟිඩියාව
අම්මා එලාම් එක තිබ්බාද?
ඇහැරෙයි නේද අප්පච්චිට?
ඇහැරින්න කෝ මට නින්ද?
වත්ත පහල යෝද ඇල
යන එන ජයගඟ බන්ට් එක
බෙලි දිවුල් අඹ ඇබිල්ල
අයියලා අක්කලා රොත්ත
එනකල් මඟ බලන් ඇති සීයා
ආ කිරිදුවලා ආවද
අත්‍තම්මා දොදොල් හැලියක්
හැදිගාලා ඇති මෙලහකට
මාතලේට හිම වැටෙන සීතලේ
මහ පාන්දර හතරට
හතර වටින් කිරල්ලු කෑගනකොට
අදටත් මගේ හිත හිරි වැටයි
හිත දුවන මේ සංසාර මතකෙට
පහයි කාලට ඇල්කඩුවෙ බස් එකේ
අප්පච්චිගේ උකුලේ කකුල් තියාන
අම්මාගේ ඔඩෙක්කේ හිස තියාන
ජනේලෙන් එපිට කලුවරේ
උඩ බලාන ගිය ගමන ගමේ
අදටත් මතකයක් දෑස් තෙමන
මාතලේට හය කිට්ටු කරන කොට
වට පිට ටික ටික එලිය වැටෙන හැටි
ගස් මුදුන් ලයිට් වයර් එකින් එක
ඇස් පහු කරනකොට එන කරකැවිල්ල
කට ඇබුල් වේගන එද්දී
දෑස් තදින් පියාගෙන
බඩ දැගලිල්ල යටපත් කරගන්න
පුංචි මං කරපු යුද්දෙ!
හයට මාතලෙන් තලාව පාර
අනුරාධපුර සීටීබී බස් එක
නාවුල පහු කරන් දඹුල්ල කිට්ටු වෙද්දී
මගේ සුන්දර කාන්‍තාරය
පාර අයිනේ වේලිච්ච ඉලුක් පදුරු
තෙක් මානෙ වෙල් යාය
අතරින් පතර වැවු
අනේ මං ගමේ ආවා!
හිරිපිටියාගම හන්දියෙන් බැහැලා
කරඹෑව පාරේ අම්මා එක අතකින්
අප්පච්චී අනිත් අතින් අල්ලන්
ඒ දෙන්නගේ අනිත් අත් දෙකේ
කද මලු ඇදුම් කැඩුම් බර
කොච්චරක් දුර පයින් ගාටන්නද
අනූ ගනන් වල කොයින්ද ටුක් ටුක්
උඩ පැන පැන මං ගිය සතුට
ලොකු මාමලාගේ ගෙදර මහපළවෙනියට
තේ බීලා ගිමන් නිවන් එතනින්
ජය ගග බන්ට් එක දිගේ මහ ගෙදරට
ඔන්න පාර යනවානම් මගේ ගමට
ඒසී වාහනේ සුව පහසු ආසනේ
ගම යද්දි අද හීල්ලෙන්නෙම
ඒ මතක අතරේ දුවන හිත
තේ බොන්න නවතින්න
ලොකු මාමා නැති ගෙදර
මඟ බලන්න නැති සීයා
දොදොල් හැදිගාන්න නැති අත්තම්මා
දීගතල ගොස් ගමෙත් නැති
අයියලා අක්කලා රොත්ත
නොනැවතී දුවන කාලය
අතරේ අතරමංවෙන හිත
මෙල්ල කරන්න හැකිනම් ආයෙ නුදුවන්න!